డిజిటల్​ అరెస్ట్​ పేరుతో రూ.1.38 కోట్లు కొట్టేసిన సైబర్​ కేటుగాళ్లు

ఇద్దరిని అరెస్ట్​ చేసిన సైబర్​ క్రైమ్​ పోలీసులు

Ekaburu - క్రైమ్ / హైదరాబాద్ : "మీ బ్యాంక్​ అకౌంట్ల ద్వారా మనీ లాండరింగ్​ జరిగింది... మిమ్మల్ని డిజిటల్​ అరెస్ట్​ చేస్తున్నామని భయపెట్టి ఓ 82 ఏళ్ల రిటైర్డ్​ ఇంజనీర్​ నుంచి 1.38 కోట్ల రూపాయలు కొల్లగొట్టారు సైబర్ నేరగాళ్లు. వృద్ధుడి పిర్యాదుతో రంగంలోకి దిగిన సైబరాబాద్​ సైబర్​ క్రైమ్​ పోలీసులు ఇద్దరు వ్యక్తులను  అరెస్ట్​ చేశారు. సైబర్​ క్రైమ్​ పోలీసులు తెలిపిన వివరాల ప్రకారం.. నగరానికి చెందిన రిటైర్డ్​ ఇంజనీర్​(82)కు ఓ వ్యక్తి ఫోన్ చేసి తాను ఎస్​బిఐ ప్రతినిధి అంటూ పరిచయం చేసుకున్నాడు. మీ బ్యాంక్​ అకౌంట్ల ద్వారా మనీ లాండరింగ్​ జరిగిందని, మీపై కేసు నమోదయ్యిందని భయపెట్టాడు. మీతో ముంబై సైబర్​ క్రైమ్​ అఫీసర్​ మాట్లాడుతాడంటూ వాట్సప్​ కాల్​లో మరో వ్యక్తితో మాట్లాడించాడు.

Also Read : మూడు రోజుల పోలీసు కస్టడీకి మోస్ట్ వాంటెడ్ క్రిమినల్ బత్తుల ప్రభాకర్

సదరు వ్యక్తి వృద్ధుడితో.. మీ బ్యాంక్​ అకౌంట్ల ద్వారా మనీ లాండరింగ్​ జరిగిందని, మీ అధార్​ వివరాలు ఇవ్వాలని, మీ బ్యాంక్​ అకౌంట్లను చెక్​ చేస్తామని చెప్పడంతో, భయపడిపోయిన వృద్ధుడు తన అధార్​ కార్డు వివరాలను వారికి చెప్పాడు. ఆ తర్వాత వారి బెదిరింపులకు భయపడిన వృద్ధుడు వారు చెప్పిన బ్యాంకు అకౌంట్లకు 1.38 కోట్ల రూపాయలు ట్రాన్స్​ఫర్​ చేశాడు. తరువాత సన్నిహితులకు చెప్పడంతో విషయం వెలుగులోకి రాగా, మోసపోయినట్లు గుర్తించిన రిటైర్డ్​ ఇంజనీర్​ సైబర్​ క్రైమ్​ పోలీసులకు ఫిర్యాదు చేశాడు. కేసు నమోదు చేసుకున్న పోలీసులు తమిళనాడులోని తిరుచిరాపల్లికి చెందిన శంకర్​ గణేష్​(46), సహచరుడు ఎలంచెజియన్​ సత్యవేల్​లను అరెస్ట్​ చేశారు. శంకర్​ గణేష్​ తన అనుచరుడితో కలిసి 10శాతం కమిషన్​ తీసుకొని సైబర్​ నేరగాళ్లకు   బ్యాంకు అకౌంట్లను సరఫరా చేస్తున్నట్లు పోలీసులు గుర్తించారు.  సచిన్​, జెస్మిన్​ మోండల్​​, ముత్తుకుమార్​, సలీమ్​ అనే వ్యక్తులు అఫీసర్లుగా నటిస్తూ డిజిటల్​ అరెస్ట్​ పేరుతో కోట్ల రూపాయలు కొట్టేసి తమ అకౌంట్లకు ట్రాన్స్​ఫర్​ చేసుకుంటున్నారు. ప్రస్తుతం వీరు పరారీలో ఉన్నట్లు పోలీసులు తెలిపారు.